Cinayət törətmiş şəxs pul müqabilində həbsdən azad oluna bilərmi?

Bəli. Girov qismində qətimkan tədbiri böyük ictimai təhlükə törətməyən və ya az ağır, habelə ictimai təhlükəliliyi yalnız maddi ziyanla bağlı olan və ya ehtiyatsızlıq üzündən ağır cinayətləri törətməkdə ittiham olunan şəxsin həbsdən azad edilməsi, lakin onun cinayət prosesini həyata keçirən orqanın sərəncamında qalmasını təmin etmək məqsədi ilə məhkəmə tərəfindən müəyyən edilmiş pul məbləğini və ya digər qiymətli əşyaları dövlət bankında məhkəmənin depozitinə qoymaqdan ibarətdir.

Məhkəmənin qərarı ilə girov qismində daşınmaz əmlak da qəbul edilə bilər. Girov yalnız müdafiə tərəfinin vəsatəti ilə məhkəmə tərəfindən seçilir.

Məhkəmə girovun məbləğini həddən artıq yüksək təyin etməməli, məbləğ aşağıdakılardan az olmamalıdır:

• böyük ictimai təhlükə törətməyən cinayət törədilməsinə görə verilmiş ittiham üzrə — 5000 manat miqdarından;
• Az ağır və ya ictimai təhlükəliliyi yalnız maddi ziyanla bağlı olan və yaxud ehtiyatsızlıq üzündən ağır cinayət törədilməsinə görə verilmiş ittiham üzrə — 10000 manat miqdarından.

Girovun məbləği cinayət nəticəsində vurulmuş ziyandan və ya onun ödənilməmiş hissəsindən artıq olmalıdır.