Məhkum ayağına taxılan elektron qolbağı qırsa, itirsə cəriməsi nə qədərdir?

Belə ki, azadlığın məhdudlaşdırılması növündə cəzaya məhkum edilmiş, şərti məhkum edilmiş və ya cəzadan şərti olaraq vaxtından əvvəl azad edilmiş şəxslər elektron nəzarət vasitəsini gəzdirməkdən imtina etdikdə, onu zədələdikdə və ya digər üsulla yararsız vəziyyətə saldıqda, yaxud həmin vasitənin işlək vəziyyətdə saxlanılması üçün üzrsüz səbəbdən ona xidmət etmədikdə, müvafiq olaraq Cəzaların İcrası Məcəlləsinə uyğun tədbirlərin görülməsi üçün icra məmuru (probasiya üzrə) tərəfindən məhkəməyə təqdimat verilir.

Müəyyən edilmiş qaydalara əsasən, elektron qolbağın qəsdən zədələnməsi və ya itirilməsi halında məhkum, cihazın təmir və ya əvəzlənməsi üçün məsuliyyət daşıyır. Bu məsuliyyət, cihazın dəyərinin ödənilməsi və əlavə cəza tədbirləri ilə nəticələnə bilər. Sözügedən elektron qolbağın dəyəri 2277 manatdır.

Habelə, Nazirlər Kabinetinin 2018-ci il 10 aprel tarixli 144 nömrəli qərarının 8.1-ci maddəsinə əsasən şərti məhkum etmənin, cəzadan şərti olaraq vaxtından əvvəl azad etmənin, azadlığın məhdudlaşdırılmasının və ya ev dustaqlığının müddəti bitdikdə, ləğv edildikdə elektron nəzarət vasitəsi icra məmuru (probasiya üzrə) və ya polis orqanı tərəfindən birdəfəlik çıxarılır və onun texniki vəziyyəti barədə aktla birlikdə monitorinq mərkəzinə göndərilir. Lakin elektron nəzarət vasitəsi çıxarılanadək isə məhkum edilmiş şəxs onu qorumalı və sonra isə onu təhvil verməlidir.